Gudniinka xubinta taranka ee dumarka – xalaaleynta xubinta taranka
Omskärelse av snippan | Könsstympning - somaliskaGudniinka xubinta taranka dumarka ayaa waxa sidoo kale loo yaqaanaa xalaaleynta xubinta taranka. Taasi micnaheedu waxa weeye in qof uu gooyey ama uu dhaawacay qaybo ka mid ah xubinta taranka ee dumarka. Waxa jira caawimaad fiican oo aad heli kartid haddii aad dhibaato dareemayso gudniinka kadib. FG: sawirro xassaasi ah!
Sidee ayay u eekaan kartaa?
Gudniinka xubinta taranka dumarka waxaa loo sameeyaa siyaabo kala duwan. Marmarka qaarkood qaybaha bannaanka ee xubinta taranka dumarka ayaa waxyeello gaartay, ama qaybo ka mid ah ayaa laga gooyey. Marmarka qaarkood way adag tahay in la arko in wax la gooyey. Halkan waxaa ku yaal dhowr tusaale oo muujinaya sida ay u ekaan karto.
Waxaad wali ku raaxeysan kartaa galmada
- Nooca ay doonto xubintaada taranka ee dumarka ha u ekaatee, waxaad weli dareemi kartaa rabitaan galmo oo aad ku raaxaysan kartaa galmada, kaligaa iyo dadka kale labadaba.
- Nooca ay doonto xubintaada taranka ee dumarka ha u ekaatee, waxaad weli dareemi kartaa rabitaan galmo oo aad ku raaxaysan kartaa galmada, kaligaa iyo dadka kale labadaba.
- Waxa jira meelo kale oo badan oo jirka ku yaalla oo raaxo laga dareemo marka la taabto.
- Waxay biyuhu kaa iman karaan xataa haddii lagugu guday.
Waxa dhibaato kuu keeni kara gudniinka
Dadka qaar loo sameeyey gudniinka xubinta taranka dumarka ayaan wax dhibaato ahba dareemin. Halkan waxa ku yaala qaar ka mid ah dhibaatooyinka aad la kulmi karto haddii lagugu guday:
- Waxa kugu adkaan karta kaadida. Waxay qaadan kartaa wakhti dheer ama way ku xanuujin kartaa. Waxaad marar badan qaadi kartaa infakshanka kaadi mareenka.
- Waxa dhici karta inaad dhibaato kala kulanto caadada. Waxay noqon kartaa mid xanuun badan ama waxa adkaan karta in dhiigga caadadu si fudud uga soo baxo.
- Waxa dhici karta inaad dareento cidhiidhi ama xanuun markaad galmoonayso. Xanuunku waxa uu noqon karaa mid aad u daran oo aanay suurtagal noqon in galmo la sameeyo.
- Qaybaha bannaanka ee xubinta taranka dumarka iyo qaybo kale oo ka mid ah xubinta taranka ayaa ku xanuuni kara. Waxa ku samaysmi kara nabaro iyo buurbuurro xanuun leh.
Caawimo ayaa la heli karaa
Waxaad tagi kartaa rugta caafimaadka dhalinyarada (ungdomsmottagning) ama xarunta daryeelka caafimaadka (vårdcentral) haddii aad qabto dhibaatooyin ka dhashay gudniinka gabdhaha (FGM). Waxaad la hadli kartaa kalkaalisada iskuulka haddii aad dhigato iskuulka.
Waxaa jira xarumo ku yaal saddex meelood oo kala duwan oo Iswiidhan ah kuwaas oo ku takhasusay daaweynta dhibaatooyinka uu sababo gudniinka gabdhaha. Waxaad tagi kartaa xarun meel kasta oo aad kaga nooshahay Iswiidhan (linkiyadu waxay ku geynayaan bogag internet oo af Iswiidhish ah).
- AMEL-mottagningen, Stockholm
- Aminamottagningen, Uppsala
- Vulvamottagningen, Angereds närsjukhus. Göteborg
Caawimada aad heli karto:
- Umuliso ama dhakhtar ayaa hubin kara in lagu guday iyo in kale. Waxa laga yaabaa inaanad si buuxda u hubin in lagu guday iyo in kale.
- Waxa suurtogal ah in qaliin loo sameeyo daloolka xubinta taranka ee la isku tolay si mar kale dib loogu furo. Marmarka qaarkood ayaa taas loo baahan yahay haddii aad rabto inaad galmo samayso ama aad ilmo dhasho.
- Waxaad heli kartaa caawimo ah in lagaa saaro buurbuurrada ku yaalla kintirka haddii ay xanuun kuu keenayaan.
- Waxaad la hadli kartaa qof haddii aad wax xun dareemeyso, tusaale ahaan inaad xasuusaneyso gudniinka.
Shaqaaluhu waxa saaran waajibka sir haynta, taas oo macnaheedu yahay inaanay cidna u sheegi doonin inaad daryeel caafimaad raadsanayso.
Waa sharci darro in la sameeyo gudniinka gabdhaha
- Waa adiga ikhtiyaarkaaga haddii aad rabto inaad qof u sheegto in lagu guday. Sidoo kale waa adiga ikhtiyaarkaaga haddii aad rabto inaad qof tusto sida ay u egtahay. Ma aha wax dambi ah in lagu guday.
- Laakiin waa sharci darro in qof lagu sameeyo gudniinka gabdhaha. Qof kasta oo qorsheeya gudniinkan, qof kale ka codsada inuu sameeyo ama isaga laftiisu sameeya ayaa sharciga jebinaya. Tani waxay khusaysaa xataa haddii aad tagto waddan kale si gudniinka loogu sameeyo halkaas.
- Ma ka welwelsan tahay in qof lagu sameeyo gudniinka gabdhaha? La xidhiidh adeegga bulshada ama booliiska. Waxa aad la hadli kartaa kalkaalisada dugsiga ama qof weyn oo kale oo aad ku kalsoon tahay.
